La Vuardie di Finance di Pordenon e à scuviert, dal principi dal an, 15 lavoradôrs iregolârs – il prin dilunc di un cenon di prin dal an – di lôr 8 forescj, sanzionant 10 diviers datôrs di lavôr e sospindint 4 ativitâts. Lis Flamis zalis a àn scuviert di fat l’implei di personâl “in neri” in misure superiôr dal 10 par cent dal totâl des maestrancis assumudis in maniere regolâr.
La ativitât dai financîrs si è concentrade in particolâr intai setôrs ristorazion, servizis ae agriculture, cumierç e edilizie. Il prin aciertament dal 2024 al è sucedût dilunc dal prin dal an, cu la scuvierte di un lavoradôr in neri assegnât al servizi aes taulis intun ristorant che al veve organizât un cenon. Altris 2 lavoradôrs a son stâts cjatâts intai controi condots in ocasion de Fiere Extracon, intant che 6 a son stâts individuâts intal cors des verifichis su mieçs comerciâi in passaç. Un lavoradôr iregolâr al è stât scuviert intun cantîr edîl di S. Vît dal Tiliment e altris 5 bracents, ducj forescj, a son stâts cjatâts intes campagnis di S. Vît.
Dilunc dal 2023 a son stâts 156 i intervents fats des Flamis Zalis dal Friûl Ocidentâl a tutele dal marcjât dal lavôr, che si son concludûts cu la scuvierte di 229 lavoradôrs in neri, 23 lavoradôrs iregolârs e cu la verbalizazion di 140 impresis, di chestis 59 sospindudis. (a.d.g.) – 24.01.2024
