E je stade une concezion personâl e etiche dal dirit ae salût a sburtâ l’ex diretôr gjenerâl de Sanitât de Lombardie Carlo Lucchina a impedî che a Eluana Englaro al fos blocât il tratament che le tignive in stât vegjetatîf.
Lu à scrit la Cort dai conts, che e à condanât in apel Lucchina a paiâ plui o mancul 175 mil euros che la Regjon e à scugnût dâ a Beppino Englaro, costret a puartâ la fie intune struture sanitarie in Friûl, dulà che daspò e je muarte.
“No je stade une obiezion di cussience, ma a son stadis aplicadis lis diretivis rivadis ancje de Avocature regjonâl” al à visât il funzionari che cumò al varà di decidi se ricori in Cassazion. Comentant la sentence, il pari di Eluana al à dit che “a podevin evitâ dut ce che al è sucedût. Cumò si visin di vê sbaliât e a àn di rispuindi dai lôr erôrs”. (a.d.g.) – 03.06.2024
