Emergjence pal brut timp: 5,6 milions di euros par sîs Comuns de Cjargne

Plui di 5,6 milions di euros a son stâts metûts a disposizion, de Protezion civîl dal Friûl-Vignesie Julie, pe messe in sigurece dal teritori, pe esecuzion di intervents urgjents e di no podê rimandâ, par comedâ i dams causâts de emergjence meteo dal Dicembar 2020 in Cjargne.
A dâ notizie il vicegovernadôr cun deleghe ae Protezion civîl dal Friûl-Vignesie Julie, che al à sotlineât cemût che si trate di une gnove tranche di stanziaments che e permetarà di rindi simpri plui sigûr e resilient il teritori regjonâl, a tutele des comunitâts che a son a stâ in mont.
Destinataris dai fonts a son sîs Comuns de Cjargne, che a fasaran lis oparis in autonomie, tant che subiets atuadôrs. A son For disore (640 mil euros), For di Sot (805 mil euros), Davâr (un milion e 320 mil euros), Ravasclêt (585 mila euro), Rigulât (1,4 milions di euros) e Zui (835 mila euro). (A.D.G.) – 28.03.2023