L’escursionist Gianpaolo Baggio, dispierdût di sabide ai 25 di Jugn, al è stât salvât inte matinade dai 2 di Lui passe une setemane dopo che al jere stât dât l’alarme. Lumât dal elicotar dai pompîrs dilunc dal enesim sorvoli parsore la ferade Palme, l’om al è stât recuperât daurman e tirât sù tal mieç. Si cjatave a un centenâr di metris di distance dal itinerari de ferade.
Lis ricercjis di Baggio a jerin ladis indevant par dute la setemane. In vore uns trente tecnics di dutis lis fuarcis impegnadis: Socors Alpin, Pompîrs, Vuardie di Finance, Carabinîrs.
E jere stade esplorade di gnûf dute la part alte de ferade “Palma”, controlant lis liniis dulà che al podarès jessi colât e i cjanâi parsot. Sul troi cjapât par tornâ indaûr, il n. 725, e ancje chi su lis zonis plui ertis e no segnaladis, si son movudis di gnûf lis Unitâts Cinofilis, cinc in dut: dôs dal Socors Alpin, dôs dai Pompîrs, une de Vuardie di Finance. (A.D.G.) – 04.07.2022
