Di vot agns e 6 mês a 4 agns di reclusion. E je stade plui che dismiezade in apel la pene a Emanuela Petrillo, la ex assistent sanitarie condanade in prin grât pes vacinis falsis in Venit e in Friûl. La Cort di apel di Triest vuê e à acetât il concuardât tra il difensôr de femine, l’avocat Paolo Salandin, e la Procure gjenerâl di Triest. L’acuardi al previodeve un grant sbassament de pene in cambi de rinunzie a dutis lis impugnazions, fale che par chê che e rivuarde la mancjade concession in prin grât des atenuantis gjenerichis.
La femine venite, 37 agns, origjinarie di Spresiano, e jere acusade des falsis inoculazions di vacinis a centenârs di fruts tra Trevîs, Udin e Codroip dal 2009 al 2016 e l’an passât e jere stade condanade par peculât, omission di ats di ufici e fals ideologjic. Vuê il câs si siere in maniere definitive. Il difensôr, di fat, al à anunziât za che nol presentarà ricors in Cassazion.
“O soi ripiât e slizerît – al à dit ae fin de udience – par jessi rivât a evitâ la preson ae mê assistude. A chest pont al è pussibil domandâ une pene alternative ae reclusion. Prest – al à concludût – o domandarìn l’afidament ai servizis sociâi e, se e sarà dimostrade la buine condote, la pene e podarà jessi ridote di un an”. (a.d.g.) – 27.11.2023
