“La Zonte, dade dongje intune sentade straordenarie, e à cjapât at de scjadince dal timp di publicazion cence che a fossin presentadis osservazions e e à fatis buinis lis dôs variantis al Plan regoladôr comunâl e i plans di recupar relatîfs di un imobil logât in vie Praclûs e di un in vie Magrini”. Lu à comunicât la assessore ae Planificazion teritoriâl, Giulia Manzan.
Lis variantis – e à spiegât – a son za stadis adotadis tal Consei comunâl, dulà che a tornaran pe aprovazion definitive, e a tocjin la trasformazion de zone interessade dal intervent de categorie A1, che e permet dome il recupar conservatîf, a categorie A3, par permeti la ristruturazion edilizie”.
Intal specific, lis dôs parts imobiliârs interessadis dal intervent a tocjin il recupar dal ex paveon infetîfs in vie Praclûs, intervent che al jentre inte cualificazion urbane dal Borc di Praclûs e che al permetarà ae Quiete di slargjâsi ancjemò doprant chei spazis par gnûfs edificis aministratîfs e salis comunis de cjase di ricovar, e il recupar di une part logade in vie Magrini relative a dôs abitazions.
“La aprovazion di chestis variantis e dai plans di recupar relatîfs – e zonte la assessore Manzan – e va inte direzion di favorî la ricualificazion dal patrimoni esistent intal centri storic e al anticipe il lavôr, che l’Ufici Urbanistiche al à za scomençât, di ricognizion largje e articolade di parts di tiessût urban dal centri citadin relative a zonis ex A2 dal Prgjc che al jere in vore prime, che vuê a son classificadis in maniere improprie zonis A1”. (A.D.G.) – 18.01.2023
