Femine blocade dai carabinîrs intant che e saltave su lis machinis

Une femine di 37 agns, forsit cjapade di un raptus, e à tacât domenie tal dopomisdì a Pordenon a saltâ su lis machinis parcadis denant de preson e a berghelâ robis cence nissun sens.

I carabinîrs, clamâts di cualchidun che al passave di chês bandis, a son rivâts daurman e le àn blocade no cence fadie parcè che la siore prime e à cirût di scjampâ e dopo e à tacât a tirâ pidadis e pugns bande dai agjents. Dai controi fats al è saltât fûr che la femine e varès vût di jessi a cjase parcè che e jere ai arescj domiciliârs e cussì e je stade arestade e tornade a mandâ ai arescj dentri cjase sô. (a.d.g.) – 11.03.2025