Svolt intes investigazions sul omicidi di Lauretta Toffoli, la femine classe 1948 cjatade cence vite, inte matine sul tart di sabide, intal so apartament in vie della Valle 4, intal cuartîr udinês di Sant Roc, cun diviersis feridis di tai.
Inte sere al è stât fermât un vicin di cjase de femine, Vincenzo Paglialonga, 40 agns, che si cjate cumò in preson. L’om al è stât za interogât, ma si è avalût de facoltât di no rispuindi.
L’om al jere di pôc tornât a vivi intal condomini Ater, dopo un periodi di detenzion; al jere ai arescj domiciliârs, cul braçalet eletronic.
Su lis investigazions al reste, par ore, il segret massim, in spiete di sclarî ducj i detais di cetant fat.
Il cuarp cence vite de 74enne al jere stât cjatât mieç disvistît, a tiere, inte stanzie dal fi, ma segns di sanc a jerin presints ancje in tinel e ae jentrade de abitazion, element che al fâs presumi ce Lauretta Toffoli che e vedi provât a difindisi. L’apartament al jere in disordin.
Su la base de perizie dal miedi legâl, il delit al podarès rimontâ aes primis oris di sabide, tra la 1 e lis 2.
A dâ l’alarme, intal prin dopomisdì di sabide, al jere stât stât il fi Manuel, che al jere lât in visite ae mari. Dopo l’alarme, la zone e je stade isolade des fuarcis dal ordin par rilêfs e aciertaments, tu voltis de squadra Mobile e de Polizie Sientifiche.
Ai 9 di Novembar dal 2019 la anziane e jere stade agredide dal fi, che le veve scurtissade al adom.
