Femine e cole intun canâl e si fâs mâl a Rigulât

Îr sore sere une femine di 65 agns e je colade intun canâl di scolament par fortune cence aghe, font plui o mancul doi metris. L’incident al è sucedût dilunc de strade regjonâl 355, pôc lontan di un dipuesit di len, intune zone cun pocje lûs.

Sul puest a son rivâts i Vigjii dal fûc di Rigulât e di Tumieç, adun cui sanitaris dal 118 e i volontaris dal Socors alpin. Daspò vê stabilizât la femine feride, che no rivave a tirâsi su’ di bessole, i socoridôrs le àn metude suntune barele e le àn puartade fûr dal canâl par dopo metile sul elicotar che le à puartade tal ospedâl di Tumieç par fâ i esams. Sul puest ancje i carabinîrs par sclarî ce che al jere sucedût. (a.d.g.) – 20.01.2025