Fat grâf di violence cuintri une femine a Udin. Il fat al è stât fat savê dome vuê de Cuesture di Udin. Colpevul un om di vincj agns, resident in provincie, che joibe ai 20, vie pe gnot pôc dopo la une, al à agredît une femine intal so apartament, dopo vê cjapât cun je un apontament.
Jentrât in cjase, convinçût che no fossin altris personis, dopo jessi lât in bagn, al à colpît cun violence e plui voltis la femine al cjâf cuntune butilie di veri che al veve platât sot dai vistîts, causant ae vitime diviers tais e feridis ae muse.
L’om al à provât a lâ fûr de abitazion, par sierâsi dopo in bagn e scjampâ dal barcon, intant che un coincuilin de femine feride e un neturbin, alertât des berladis de vitime, a devin l’alarme ae sale operative de Cuesture. Sul puest a son rivâts i agjents di dôs patuliis de Squadra volante. Identificât l’autôr in graciis de descrizion dal agressôr, i poliziots a sob rivât pôc dopo inte abitazion dal pari che nol saveve nuie. Il zovin al è stât cjatât inte sô cjamare, dulà che a son stâts scuvierts ancje lis scarpis e i vistîts sporcs di sanc, mitûts sot secuestri. Arestât daurman l’omal è stât puartât in preson. Inte matinade di sabide, validât il so arest, il Jip al à decidût la misure de custodie cautelâr in preson. (ADG) – 24.10.2022
