Femine si fâs mâl intune boschete intant che e lavorave cul om

Une femine di 61 agns, residente tal teritori di Cividât, e je stade socorude tal prin dopomisdì di vuê a Porçûs, intune boschete indulà che e stave lavorant cul so om par meti a puest il teren.

La femine e je colade patint une pussibil crevadure de gjambe e feridis tal cjâf. Sul puest a son rivâts daurman i sanitaris e i volontaris dal Socors alpin di Glemone che le àn metude suntune barele e puartade sù pes spalis fintremai li de ambulance. (a.d.g.) – 18.02.2025