Il cjâr fits nol pese dome sui students universitaris, ma ancje sui zovins miedis. A dîlu al è l’Ordin dai miedis di Udin che al à pôre che i presits aes stelis pai apartaments in citât a puedin ancjemò di plui sburtâ la fuide dai cjamesots blancs de capitâl furlane e de regjon. Il probleme nol rivuarde dome i miedis di medisine gjenerâl, ma ancje i specializants che a sielzin un ospedâl furlan par finî il lôr percors formatîf.
“Il cjâr fits al pues disincentivâ cui, par esempli, si invie ae profession e al à di frontâ za altris coscj come che la viertidure di un ambulatori – al aferme il president dal Ordin dai Miedis di Udin, Gian Luigi Tiberi -. Il nestri auguri al è che lis istituzions a cjapin in considerazion cheste problematiche, parcè che si va a pericul di lassâ scuviertis ciertis zonis, soredut chês plui disasiadis, tant che chês di mont”.
“Za o savìn – al precise il president – che a son areis che no rapresentin la prime sielte dai miedis di medisine gjenerâl e di continuitât assistenziâl. Dâ lôr la pussibilitât di afitâ une cjase o un apartament a coscj contignûts al pues rapresentâ un altri incentîf”. (A.D.G.) – 01.06.2023
