La bugade di timp brut che e à batût fuart dut il Friûl-Vignesie Julie e à causât inagaments e slacs, soredut inte zone dongje de mont dal Friûl Ocidentâl. I comuns plui fiscâts a son chei di Frisanc, Polcenic e Pinçan, indulà che tal dopomisdì al è rivât par un sorelûc l’assessôr regjonâl ae Protezion civîl Riccardo Riccardi.
Lis ploiis fuartis a àn puartât passe 350 milimetris su lis Prealps Cjargnelis e plui di 200 milimetris su chês Juliis.
Ae sale operative de Protezion civîl di Palme a son rivadis segnalazions di inagaments ancje a Cjanive, Montreâl, Manià, Trasaghis. A son lâts ju’ par cause dal aiaron arbui a Secuals, Cordovât, Torean, Nimis e Taipane, intant che dilunc de strade di Mezzomonte di Polcenic al è vignût ju’ un slac che al à blocât une auto intant che e passave.
Sierâts i vâts di Murlis e Rossêt e blocade ancje la viabilitât dilunc de Sp 22 de “Val Cosa” dongje Clausêt par un altri slac. (a.d.g.) – 09.10.2024
