Lis vacancis di une famee furlane di Tresesin si son trasformadis in tragjedie a Marsa Alam, in Egjit, indulà che Mattia Cosettini, nûf agns, al è muart daspò vê vût un mâl.
La famee si cjatave inte localitât sul Mâr Ros dilunc des fiestis cuant che il frut, che al veve fat i agns, si è sintût mâl e al à pierdût i sintiments intant che al jere in barcje cul pari Marco, la mame Alessandra e so fradi plui piçul.
Cuant che Mattia si è sveât pôc dopo, al veve contât di vê un fuart mâl di cjâf e cussì i gjenitôrs lu àn puartât daurman dal miedi dal resort, che al à pensât a un colp di cjalt e al à prescrit une flebo e cualchi medisine. La gnot dopo, magari cussì no, la situazion e je lade in piês e il frut al è stât puartât in ospedâl, indulà che al è muart sul cricâ dal di’ dai 5 di Zenâr. La ipotesi e je che Mattia al sedi muart par vie di une emoragjie cerebrâl.
“No savìn cun precision ce che al sedi sucedût – al conte il pari Marco -. O stin spietant di savê alc di plui, ma gno fi al à simpri vût une salût di fier e al stave ben fin cuant che no si è sintût mâl”. La famee si è metude intes mans dal avocat Maria Virginia Vaccari di Udin. (a.d.g.) – 07.01.2025
