Une piçule di 18 mês e à glotût une gusiele lungje 5 centimetris lant a risi di restâ scjafoiade, ma la bravece e professionalitât di une scuadre multidissiplinâr dal ospedâl Burlo Garofolo le à salvade.
Al è bastât un moment di distrazion e la frute e à parât jù la gusiele cence che la mari e rivàs a blocâle. La piçule e je stade puartade daurman tal ospedâl indulà che i miedis a àn fat l’intervent durât une ore, ancje parcè che a vevin di fâ di mancul che la gusiele e podès fâ dams intant che le tiravin fûr inte trachee e ancje a cûr e arteriis.
“E je une brute esperience – al à dit Domenico Leonardo Grasso, referent de endoscopie diagnostiche e interventistiche des primis viis aeriis de Otorinolaringoiatrie e Audiologjie dal Burlo Garofolo che al è stât daûr dal câs – che, magari cussì no, e sucêt une vore dispès”. (a.d.g.) – 14.03.2025
