No son par nuie buinis lis gnovis che a rivin de mont, massime di Mueç, indulà che il fûc sul mont Cimadôrs al va indenant, cun dut che a son in vore Canadair, elicotars e cetant personâl. Vuê di matine dute la val dal Tiliment e jere plene di fum fintremai Glemone e l’odôr di stiç si nasave ancje inte zone culinâr.
Par cause des temperaduris une vore plui altis de medie – si fevele di passe 5 grâts in plui par cheste part dal an – e de pocje ploie di cheste Istât, il fûc tacât ancjemò ai 19 di Avost al à tornât a cjapâ fuarce e cumò al menace lis abitazions di Muiesse, localitât di Mueç indulà che a vivin une desene di personis. E chest cun dut che al è rivât a dâ une man un altri Canadair di Gjenue (cumò ‘nd è trê in dut in svol) plui i trê elicotars de Protezion civîl regjonâl.
Dopo dal sorelûc dal sindic di Mueç adun cul personâl de Protezion civîl, si sta scrivint la ordenance di evacuazion dai residents de piçule frazion di Muiesse. (a.d.g.) – 02.09.2024
