E je ancje une femine di cent agns tra chês puartadis tal ospedâl par cause de fuide di monossit di carboni intune palacine di Romans dal Lusinç tal dopomisdì di îr, tor des cinc mancul un cuart.
Lis cundizions de siore no saressin grivis, ma e je ancjemò tal ospedâl di Gurize par precauzion. E sarès invezit plui dificile la cundizion di une altre femine residente tal stes edifici, che e je stade ricoverade tal ospedâl di Triest, ancje se nol somee che e sedi in pericul di vite. Sul puest i Vigjii dal Fûc di Gurize, che dopo vê sierât ducj i implants di riscjaldament a àn vierzût i barcons, e il personâl sanitari.
Si sta cumò cirint di capî ce che al è sucedût te palacine tal centri di Romans e cemût che al è rivât il gas velenôs.
Dut câs, si trate di un gnûf incident tal zîr di un mês inte nestre regjon: in doi câs, a For Disore e a Triest, a jerin muartis dôs personis. (a.d.g.) – 27.01.2025
