La patulie de Polizie stradâl di Palme in servizi dilunc de A4 si è metude in suspiet daurman cuant che dilunc de autostrade e à viodût un furgon che al viazave sorecjamât.
I controi sul camion, fats prime dongje dal casel autostradâl di Vilès, dopo a Palme, viodût il gnervôs dal vuidadôr, a àn permetût di scuvierzi che la pesante cjame, ben trê betonieris dal valôr di 7 mil euros, e jere stade robade la gnot dai 29 di Avrîl di un cantîr edîl in provincie di Bergamo.
Il conducent forest al è stât denunziât in stât di libertât pal reât di ricetazion. Di là dal fer dal veicul par 90 dîs, l’autotraspuartadôr al è stât sanzionât cun di plui cun 6 mil euros di multe e il ritîr de patente pes violazions gravis inerentis il traspuart internazionâl di marcjanziis e pal ûs dal cronotachigraf. Il malcjolt cjatât tal furgon al sarà tornât ai proprietaris legjitims. (A.D.G.) – 12.05.2023
