Gare di solidarietât pai presonîrs di Udin

A son in dut 38 i frigorifars comprâts par judâ a difindisi dal cjaldon chei che si cjatin dentri de preson di Udin. Vincj frigorifars a son stâts puartâts ai 14 di Avost; chei altris 18 a rivaran invezit doman in vie Spalato.

Si trate di une donazion pussibile in graciis de racuelte di bêçs volontarie inviade dal avocat Andrea Sandra, garant dai dirits des personis lassadis cence libertât personâl, adun cu lis associazions “Icaro” e “La società della ragione”. In dut i bêçs regalâts di passe 10 donadôrs a son stâts 10.500 euros, il dopli di ce che si sperave. (a.d.g.) – 20.08.2024