I scandais archeologjics davuelts de Sorintendence Archeologjie, bielis arts e paisaç pal Friûl-Vignesie Julie in doi sîts de Basse Furlane, a Rivignan, inte localitât di Ariis, e in comun di Roncjis, a Frofean, a pene sierâts, a àn fat vignî fûr contescj di ete storiche di interès particolâr.
Lis investigazions a son stadis puartadis indenant dopo di une domande di finanziament specific par verificâ la consistence di doi sîts archeologjics che fin vuê no jerin stâts identificâts cun precision, e ancje par fâ in maniere di tutelâju. I sgjâfs a son stâts puartâts indenant sul cjamp de Cora Società Archeologica Srl, in coordenament cul ispetôr onorari Sergio Salvador, e sot de direzion sientifiche de funzionarie Giorgia Musina pe Sorintendence Abap Fvg.
A Ariis di Rivignan, ancje graciis a ripresis fatis cui drons, si à podût individuâ la presince di un poç, di struturis in fondazion e di cualchi pussibile sistemazion di bonifiche di un contest di ete romane che si pues datâ tra i secui II e III d.d.C. I sgjâfs a àn puartât ae lûs une vore di materiâl ceramic, di veri e metal, e ancje cops di produzion locâl, come chel che al ateste un bol di modon che al rimande a une fornâs dal teritori di Riverote. Al è stât recuperât ancje materiâl organic: coculis, nolis, sepis di ue e un frament di trame vegjetâl, reperts che si son conservâts sul fonts dal poç in graciis de presince costante de aghe.
A Frofean di Roncjis invezit, in acuardi cul Comun, che al à colaborât ancje mandant il so personâl, al è stât netât un contest di piere cjatât di resint in bande de SP7 dal ispetôr onorari Sergio Salvador, e che al someave a risi di dispueament. Il contest al varès di rimontâ ae ete postmedievâl e al pâr componût di dôs struturis di mûr, un piçul volt di modon e cualchi epigrafe sepulcrâl. (a.d.g.) – 22.12.2024
