Gnovis scuviertis impuartantis intes termis di Aquilee

Lis termis romanis di Aquilee a jerin plui grandis e sflandorosis di ce che si pensave fintremai vuê. La struture e jere cetant grande, degne di une capitâl. Chestis termis a rifletevin in dut e par dut la considerazion che la citât e veve come residence imperiâl e il puart plui impuartant tal Mediterani dilunc dal Imperi Roman.

A palesâ la impuartance des termis a son stâts i sgjâfs archeologjics fats de Universitât dal Friûl che a àn puartât fûr une abside imponente di 30 metris di largjece, statuis di divinitâts e colonis colossâls di marmul african. I reperts cjatâts a àn judât a insiorâ la cognossince di un dai sîts archeologjics plui inmagants di Aquilee. (a.d.g.) – 02.12.2024