Grâf il ciclist coinvolt intun incident a Roncjis di Monfalcon

Al è in cundizions gravis un om di 64 agns che cheste matine al è restât vitime di un incident in viâl Mazzini, a Roncjis di Monfalcon. L’om, intant che al jere daûr a pedalâ in siele ae sô bici, si è dât cuintri cuntune veture e al è colât malementri.
Imediade la clamade al 112: mandâts sul puest une ambulance di Monfalcon, la machine di emergjence mediche di Gardiscje e l’elisocors. I sanitaris a àn stabilizât l’om, rianimantlu dopo di un arest cardiocircolatori. Dopo il traspuart in svol, cu la urgjence massime, al ospedâl Sante Marie de Misericordie di Udin. (A.D.G.) – 23.01.2023