Un om di 41 agns al è stât traspuartât in cundizions tant gravis al ospedâl Sante Marie de Misericordie di Udin par un mâl che lu à colpît inte matine sul tart intant che si cjatave intune zone di campagne a Tarcint. Il suspiet al è che il mâl grâf al sedi consecuence di un shock anafilatic par une becade di âf.
Une parinte e à clamât i socors e a son stâts mandâts sul puest l’ecuipaç di une ambulance di Tarcint e l’elisocors. Il personâl medic infermieristic al à cjapât in cjame l’om: pôc dopo de rivade de ambulance al è rivât l’arest cardiocircolatori. A son stadis inviadis lis manovris di rianimazion e il so cûr al à tornât a bati.
Par lui al è stât decidût il traspuart al ospedâl Sante Marie de Misericordie di Udin in codiç ros, cu la ambulance cun dongje il personâl dal elisocors. (A.D.G.) – 22.06.2023
