Domenie ai 6 di Avrîl, là che e je stade promulgade la Costituzion de Patrie dal Friûl, si celebraran i 948 agns de costituzion dal Stât patriarcjâl. La Fieste de Patrie dal Friûl e je une manifestazion che si davuelç di 48 agns – la prime volte e fo a Aquilee intal 1977 par iniziative di pre Checo Placerean – e che tal 2015 e je stade ricognossude cuntune leç de bande de Regjon Autonome Friûl-Vignesie Julie par ricuardâ e valorizâ lis origjins, la culture e la storie di autonomie dal popul furlan. Propit a Sacîl 659 agns indaûr, ai 8 di Novembar dal 1366, il Parlament de Patrie dal Friûl, sburtât dal patriarcje Marquart di Randeck, al promulgà lis “Constitutiones Patriae Fori Iulii” (clamadis ancje “Constitutiones Marquardi” o “Codex Marquardi”), ven a stâi il codiç dal dirit furlan, restât in vore fin al 1797. Tentatîfs par rivâ ae codificazion juridiche a jerin za stâts fats ai timps dal patriarcje Nicolau di Lussemburc, ma i disordins peâts aes vueris cuintri i Asburcs a vevin permetût di movi dome cualchi piçul pas. Marquart, dopo elet, al costituì une comission, dentri dal Parlament furlan, cu la incarghe di puartâ insom lis voris scomençadis tal passât. Ai 8 di Novembar dal 1366 al presentà lis Costituzions, par fâlis buinis, al Parlament clamât dongje propit a Sacîl. Une Cjarte che il patriarcje al rivà simpri a parâ dai tentatîfs di influence papâl, e che e meteve adun dutis lis leçs mandadis fûr dal Parlament de sô fondazion indenant. Marquart al rivà a abrogâ cualchi disposizion particolâr, massime une, che lui al calcolave contrarie al dirit civîl, naturâl, canonic e parfin a chel divin. Chê disposizion e tocjave il tratament des feminis intes cuistions di ereditât: dopo muart l’om, se nol ves lassât testament, la femine e lis fiis a saressin restadis esclududis in maniere automatiche de ereditât. Un lassit dal passât che, in graciis des Costituzions di Marquart, al fo eliminât. (A.I.) – 05.04.2025
35
