Al è un om di 50 agns di Sarone di Cjanive. Pai investigadôrs al sarès lui l’autôr dai fugarons impiâts di pôc a Davian e a Cjanive, e ancje di tancj fûcs che si son disvilupâts intai Comuns di Cjanive, Polcenic e Cordignano intai mês di Lui e Avost dal 2022.
I fûcs, domeâts in graciis dal intervent des Vuardiis dal fûc di Pordenon, Manià e Vitori Venit – cul elicotar di Mestre – e de Protezion civîl, a presentavin ducj lis stessis carateristichis: si jerin disvilupâts dal ôr de strade, a vevin interessât largjis areis di bosc e no jerin stâts cjatâts lescjaments o materiâl combustibil intai contors. Il piroman al è stât individuât îr di matine intant che, dilunc de strade che e puarte in Plan dal Cjaval, al impiave l’enesim fûc cuntune machinete.
Al è stât blocât dopo un curt tentatîf di fuide. L’om al è stât puartât in preson a Udin, a disposizion de autoritât judiziarie. (A.D.G.) – 16.02.2023
