ll judiç pe udience preliminâr (Gup) di Rome, acetant la domande de Procure, al à decidût di inviâ ae Consulte i ats dal procediment su la muart di Giulio Regeni. Il judiç al domande ae Cort Costituzionâl di esprimisi su la cuistion relative ae assence dai imputâts, i cuatri 007 egjizians, par passâ la “stasi” dal procès.
E jere tante spiete pe decision di vuê, che il legâl de famee Regeni, Alessandra Ballerini, e à definît tant impuartante pes sortis dal procès. Vuê a buinore, fûr dal Tribunâl di Rome, si è fat un sit-in a poie de famee e de ricercje de veretât, che al à partecipât ancje l’ex president de Cjamare Roberto Fico.
La domande dal procuradôr Lo Voi e dal procuradôr zontât Sergio Colaiocco al rivuardave la cuistion de costituzionalitât dal articul 420bis dal codiç di procedure penâl in teme di “assence” dal acusât. Il judiç si è risiervât di decidi inzornant il procediment ai 31 di Mai. In particolâr la Consulte e varà di decidi sul articul, cemût che al è modificât de riforme Cartabia, inte part là che nol previôt che si puedi procedi in assence dal acusât “intai câs là che la formâl mancjade cognossince dal procediment e dipendi de mancjade assistence judiziarie de bande dal Stât di apartignince o residence dal acusât stes”. Il Gup al à acetât apont la domande de Procure. (A.D.G.) – 31.05.2023
