La acuse di omicidi, intal câs de muart suspiete di Flum Venit, al cjate altris rispuestis. Il Gip dal Tribunâl di Pordenon, Monica Biasutti, e à validât intal dopomisdì di martars ai 4 di Lui l’arest di Severino Sist, l’om di 75 agns acusât dal omicidi volontari de femine Laura Pin, di 74 agns, cjatade muarte ai 28 di Jugn.
L’anzian, che di sabide si cjate inte preson di Pordenon, al patìs di cualchi patologjie e al è stât curât, in passât, dal Csm (Centro di salute mentale). Par chest no je stade confermade la misure cautelâr in preson, ma al è stât disponût l’acompagnament inte struture di S. Vît dal Tiliment, cun braçalet eletronic. Jessint stât escludût il pericul di fuide, Sist, assistût dal avocat Antonino Di Pietro, al podarà jentrâ inte sô abitazion cuant che e sarà dissecuestrade. La muart di Laura Pin, secont la autopsie fate simpri martars a buinore, no sarès dovude a un fat acidentâl, ma e sarès stade causade di tierçs. (A.D.G.) – 05.07.23
