Il Nadâl al è za rivât a Udin

A Udin al è di gnûf timp di Nadâl: ai 22 di Novembar a saran impiadis lis luminariis e la Loze dal Lionel, Palaç D’Aronco, Place Matteotti, il Cjistiel, la Stazion feroviarie, place Garibaldi e la biblioteche civiche “Joppi” a saran iluminâts di proiezions modernis. Il program al cjape dentri passe 150 avigniments culturâi in ducj i cuartîrs. Confermâts ancje il borc di Nadâl in Zardin Grant, cu la piste di patinaç vierte dai 30 di Novembar ogni dopomisdì e des 10.30 di matine intes zornadis di fieste e dilunc des feriis scolastichis. Previodûts ancje un gnûf marcjadut di Nadâl, la arene par un spetacul musicâl esclusîf e ben tredis arbui di Nadâl, ancje intai cuartîrs. Un impegn impuartant de bande de Aministrazion comunâl che, compagn dal an passât, si è proponude di gjenerâ un program complessîf di avigniments e atrazions che e cjapi dentri dute la citât, daspò dal sucès dal an passât. (A.I.) – 12.11.2024