“Vuê te Zonte o vin fat bon il progjet di fatibilitât tecniche e economiche, cul cuadri economic relatîf, di 250 mil euros, pai lavôrs di eficientament dal implant termic dal auditorium Menossi”. Al à dade la notizie il vicesindic e assessôr ai lavôrs publics Loris Michelini.
“Al progjet iniziâl, deventât il lot 1 che vuê o vin fat bon, e che al è finalizât al miorament des cundizions dal benstâ dentri de sale, o vin decidût – al à dit Michelini – di zontâ chel che al sarà il lot 2 di 180 mil euros che cun chel o podarìn doprâ al massim lis potenzialitâts di sparagn energjetic dal edifici. Intal specific cul prin lot a vignaran realizâts il cuintrisofit de sale cun isolament parsore, l’implant di termoventilazion cuntun gnûf condizionadôr in cuvierture e cun trataments separâts pe ‘zone alte’ e pe ‘zone basse’, il colegament cu la centrâl termiche pal prelêf e pe aduzion al aiar cjalt e i implants eletrics pe alimentazion di potence e di regolazion e control. Il secont lot al previôt invezit la instalazion di une pompe di calôr aiar-aghe a funzionament reversibil cuntun rindiment alt intune version supersilenziade e complete di pompe e serbatori e la coibentazion de cuvierture cun dopli strât soreponût di panei”.
“Infin, tai prossims lots che a saran ativâts intal program di gjestion dai implants termics, o fasarìn un implant fotovoltaic cun potence di ponte di 20 kW, e o calcolìn che la energjie anuâl prodote e sedi compagne a chê complessive anuâl che e covente pal funzionament de pompe di calôr e dal condizionadôr di aiar, e il gnûf gjeneradôr termic in sostituzion di chel atuâl. Cun chest intervent, duncje, – al siere il vicesindic – no sbassìn dome l’impat ambientâl dal implant, cun ancje la riduzion dai coscj di riscjaldament e di condizionament, ma ancje o garantìn ai utents de sale un ambient san dal pont di viste de cualitât dal aiar”. (A.D.G.) – 19.01.2023
