Masse costruzions vecjonis e bas nivel di conservazion de energjie: a son doi dai problemis che a rivuardin almancul la metât dai edificis de nestre regjon. Viodìn cuale che e je la situazion. L’Enea, l’ent public talian pal disvilup di gnovis tecnologjiis tal rispiet dal ambient, al à il compit di assegnâ l’Ape (Atestât di prestazion energjetiche, previodût dal 2009) ai edificis di gnove costruzion, che a passin di proprietât traviers di une compravendite, dâts a fit e a chei che a àn vût une ristruturazion impuartante o une ricualificazion energjetiche di fonde.
In Friûl-Vignesie Julie, plui di 124 mil edificis a àn vût chest atestât: 109 mil a son residencis e uns 15 mil a son uficis, impresis, scuelis e vie indevant. Di chescj imobii, 95 mil a son stâts tirâts sù prime dal 1992, dome 8.200 dopo dal 2015. Diviersis lis situazions provincie par provincie: par esempli, in chê di Udin, su 53 mil, 39 mil a son di prime dal ’92 e 4 mil dopo dal 2015; tal Friûl ocidentâl, su 28 mil, 18 mil a son fats prime dal ’92 e 2 mil e 700 dopo dal 2015.
Dut al cambie in provincie di Gurize: su 14 mil edificis, dome 776 a son stâts tirâts sù dopo dal 2015 mintri che 10 mil e 500 a son di prime dal ’92. Ancje a Triest i edificis a son plui vecjos, tignint cont de storie de citât: su 29 mil, dome 806 a son di dopo dal 2015, 27 mil a son invezit di prime dal 1992.
Une altre cuistion e je il nivel energjetic di cjasis, apartaments, uficis, buteghis, aziendis. La metât dai imobii cul atestât Ape in regjon a jentrin tes dôs fassis di classe energjetiche plui bassis, ven a stâi la F e la G. In dut, chestis classis a son dîs, de A4 (la miôr) ae G (la piês); dome il 10,2% dai edificis dal F-Vj al jentre tes cuatri fassis miôr, de A1 ae A4, intant che de B ae E al sta il 40% dal totâl e juste la metât si cjate des ultimis dôs classis. Din une cjalade a ognidune des provinciis. A Udin il 49% dai imobii a son tes fassis F e G cuintri l’11,5% de fasse A. A Pordenon, il 43% si ju cjate tes dôs piês, ma il 14% a son te fasse A; impen, a Gurize il 52% si cjate tes dôs fassis plui bassis e il 7% in fasse A, in ultin a Triest il 57% in F e G e il 4% inte fasse plui alte.
La classe energjetiche di un stabil e je une componente di fonde par podê fâ une valutazion gjenerâl di une cjase, di une aziende o di une scuele tal so complès. In dut, lis classis si dividin in dîs categoriis: A4, A3, A2, A1, B, C, D, E, F, G, lant de miôr ae piês. In pocjis peraulis, une classe energjetiche e je la certificazion dal dibisugn di energje primarie no rinovabile dal edifici: in chest, a dipendin tancj aspiets, tant che la etât dal stabil, la cualitât dai materiâi dai mûrs esternis, i sieraments e vie indevant. Chestis a son dutis considerazions peadis a une situazion che ducj noaltris o vin a ce fâ dì par dì: trop che si pues sparagnâ tal scjaldâ i ambients li che si vîf o si lavore.
La concezion e la division des classis energjetichis a son cambiadis a pet di cualchi an indaûr. Se prime si rasonave su trops Kw che a vignivin consumâts ogni an par ogni metri cuadrât, dal Otubar dal 2015 si dopre la “EPgl, nren” un indiç di prestazion energjetiche globâl no rinovabile.
In pratiche, si fonde sul rapuart tra la energje necessarie par climatizâ un apartament a 18 grâts di temperadure o, tal câs di buteghis, par scjaldâ ae stesse temperadure il so volum lort.
Nol baste: par calcolâ chest indiç si scuen ancje tignî cont de modalitât di produzion de aghe cjalde sanitarie, de ventilazion, de aerazion e de esposizion ae lûs dal soreli, de iluminazion artificiâl, des carateristichis dai implants termics instalâts e in ultin, dome pes aziendis, dal traspuart di personis e robis. (Alessio Potocco) – 4.03.2023
