In regjon a mancjin 500 infermîrs

La profession di infermîr di timp nol atire i zovins, parcè che lis retribuzions talianis a son tra chês plui bassis in Europe, al è dificil fâ cariere e a son carencis di organic impussibii di jemplâ, viodût che tancj professioniscj a lassin il sisteme public par lavorâ tal privât. E je lungje la liste dai problemis presentâts in tierce Comission regjonâl dai dirigjents dai Ordins infermieristics dal Fvj, metûts in struc intun document che al à proponût une schirie di misuris di incentîf par invertî la tindince. Lis propuestis a son stadis condividudis dal vicegovernadôr cun deleghe ae Salût, Riccardo Riccardi, che dut câs al à marcât che cierts proviodiments a son di competence dal Stât. Al moment, al sisteme a mancjin 500 professioniscj, ancje se in Fvj il numar dai lavoradôrs al è cressût intai ultins 5 agns e il rapuart tra numar di infermîrs e abitants al è miôr de medie nazionâl. (A.I.) – 07.09.2022