Sot aghe cantinis e tavernis inte zone tra Tisane, Perteade e Cisarûl di S. Michêl. Lis fuartis ploiis coladis tacant di miercus sot sere e ladis indenant par dute la zornade di joibe a àn produsût une vore di problemis, soredut inte Basse furlane. Dome a Gorc di Tisane, par esempli, a son vignûts jù 100 milimetris di aghe intes ultimis 12 oris.
Lis scuadris dai pompîrs di Lignan e di Tisane a son in vore di joibe a buinore par gjavâ vie la aghe. La situazion plui grivie e je sucedude sul cricâ dal dì a Perteade, cuant che i scarics di cuatri stradis no àn rivât plui a puartâ vie la aghe, inagant 50 abitazions cun passe 40 centimetris di aghe.
Sierât par inagament ancje il sotpàs dilunc de strade regjonâl 354 in localitât Crosaris, simpri a Tisane.
Ancje a Mortean pompîrs in vore par evitâ infiltrazions di aghe intun condomini indulà che a stan lavorant sul cuviert, fiscât de tampieste dal an passât. Puartant gnûfs telons, i pompîrs a àn rivât a ridusi i dams. (a.d.g.) – 16.05.2024
