La Procure di Udin e dispon che i aciertaments iripetibii sul ultralizêr a sedin fats in Gjermanie di une dite todescje, ma il legâl de famee Ghersi al domande che la analisi e sedi fate in Italie. A son i ultins disvilups de inchieste che e rivuarde il disastri aeri là che ai 29 di Avrîl a àn pierdût la vite il cjapitani des Frecce Tricolori Alessio Ghersi e Sante Ciaccia, parint dal pilote.
La Procure e à decidût che a fâ la perizie e sarà la todescje Franz Aircraft Enginers Vetrieb. Martars il relit al sarà imbalât par jessi traspuartât inte sede de aziende. Doi dîs dopo a podaran scomençâ i aciertaments.
Lis decisions de Procure a son in part contestadis dal legâl de famee Ghersi, l’avocat Maurizio Miculan, che al à domandât, intune istance ae stesse Procure, dulà che al è tignût cumò il relit, il non de persone fisiche che e assumarà la incarghe, la nomine di un interprete di lenghe todescje e che lis operazions a sedin fatis intun laboratori talian. Chest par evitâ che i erêts a vedin di paiâ grandis spesis di trasfierte foreste par garantî la presince dai lôr consulents tecnics aes operazions. Doman, il difensôr des trê personis indagadis par disastri aeri colpôs e omicidi colpôs, l’avocat Bruna Malattia, al deponarà a sô volte une istance cun altris osservazions su lis decisions de Procure. (a.d.g.) – 14.09.23
