Incident tragjic cheste matine, tor des 11, dilunc de Ferade a Vildivar. Une Golf rivant de strade che coleghe Frofean ae ex provinciâl 95 si è dade dentri cuntun camion cjariât di bastons di fier.
Il scuintri al è stât tant violent. Dibant il socors dai pompîrs e dai sanitaris, rivâts in curt ancje cul elisocors regjonâl. L’om che al vuidave l’auto, di 84 agns resident a Lignan, al è muart subite.
Di une prime ricostruzion, l’automobil vuidât dal anzian al jere daûr a jessî de crosere par jentrâ su la Ferade. Propit in chel moment, de strade principâl al è rivât il mieç pesant che al à colpît la Golf sul flanc çamp. Sul asfalt no son segns di frenade, fat che al fâs pensâ che il conducent de veture nol vedi viodût a rivâ il Tir.
Causis e dinamichis dal scuintri a son sot investigazion dai Carabinîrs di Tisane. (A.D.G.) – 30.05.2022
