Un fantat di plui o mancul 23 agns e une seconde persone a son stâts socorûts chest dopomisdì pes lesions ripuartadis dopo di un infortuni sul lavôr che si è verificât intune aziende di Feagne.
Par causis in cors di investigazion di bande des fuarcis dal ordin, intant che i doi oms a jerin daûr a lavorâ cuntun prodot chimic, si è diliberade une sostance tossiche. Il zovin al è restât ustionât in maniere serie; chê altre persone e je restade intosseade par vê inalât la sostance.
Mandâts daurman sul puest une machine mediche di emergjence di Udin, dôs ambulancis di S. Denêl e di Udin e l’elisocors.
Il zovin al è stât traspuartât in codiç ros, cul elicotar, al ospedâl Sante Marie de Misericordie di Udin, par une prime valutazion; chê altre persone e je stade acompagnade intal stes ospedâl in ambulance cun dentri il miedi de machine di emergjence mediche, in codiç zâl. Sul puest ancje lis Vuardiis dal fûc cuntune scuadre rivade di Udin. (A.D.G.) – 01.03.2023
