Ae une dopomisdì di vuê al è stât un incident pardabon grivi sul lavôr a Ugovize, indulà che un om di 51 agns al è restât fracât jenfri doi camions di chei che e cjapin sù lis scovacis. L’operari al stave netant un dai mieçs intune aree di soste dilunc de strade statâl 13, cuant che un altri camion, vuidât di un so coleghe che al stave fasint manovre e che no si jere visât di lui, i è lât intor.
Lis cundizions dal om a son someadis subite une vore griviis. Sul puest a son rivâts i sanitaris dal 118 e l’elicotar che lu à puartât daurman tal ospedâl di Udin. La prognosi e je risiervade. Sul puest a son rivâts ancje i carabinîrs di Pontebe e il personâl dal ispetorât dal lavôr di Glemone, che a fasin lis investigazions par capî ce che al è sucedût. (a.d.g.) – 18.11.2024
