Un scuintri violent tra dôs auto al à causât îr di sere la muart di Eder Dal Mas, un esercent di 65 agns di Tarcint, tant cognossût pe sô ativitât comerciâl. L’impat tra i doi veicui al è sucedût pôc dopo lis 9 di sere, intal centri de frazion di Cuelalt, li de crosere tra vie Manin e la Statâl 13. Par une prime ricostruzion – ancjemò di aciertâ – la Fiat Grande Punto vuidade de vitime e jere daûr a jentrâ su la Pontebane di une laterâl, cuant che si è dade cuintri cuntune Renault Clio direte bande Dartigne, vuidade di une femine zovine.
Dopo il scuintri, daurman i residents a àn butât l’alarme. Magari cussì no a son stadis dibant lis manovris dai sanitaris par rianimâ l’om, tirât fûr dal abitacul dome dopo l’intervent des vuardiis dal fûc. Feride e traspuartade tal ospedâl di Udin ancje la femine di 23 agns che e vuidave chê altre veture.
La strade e je stade sierade a lunc par permeti i socors e i rilêfs dai carabinîrs, rivâts sul puest di Sant Lenart e di Glemone. Grancj i dams aes dôs machinis, metudis sot secuestri. (a.d.g.) -07.12.2023
