Un camionist al è muart vuê a Taurian di Spilimberc intal scuintri fra il camion che al jere daûr a vuidâ, cjamât di gas propan, e une Fiat 500. L’incident al è sucedût tor de une dopomisdì, in vie Basaldella, dilunc de rampe A Strade Regjonâl 177.
Par causis in cors di aciertament de bande dai Carabinîrs, il camion de Liquigas si è dât cuintri cuntune Fiat 500, cun dentri om e femine, che a sô volte e je lade dopo cuintri in maniere frontâl a un altri mieç pesant.
Il camion de Liquigas al è finît intal fossâl e l’autist al è muart. Ferît in maniere serie l’om inte 500, che al è stât traspuartât in elicotar al ospedâl di Udin.
Sul puest trê scuadris des Vuardiis dal fûc cun diviersis ambulancis. Il trat di strade cjapât dentri tra la caserme Forgiarini e il distributôr IP al è stât sierât al trafic. (A.D.G.) – 23.06.2023
