No le à fate e al è muart par cause des feridis masse griviis Raffaele Copetti, 50 agns fats di pôc, che îr vie pe gnot, pôc dopo de miezegnot, intant che al lave fûr de vie Casali Leoncini par cjapâ la provinciâl cul so furgon. L’om al varès mancjade la precedence e al è stât cjapât in plen di une auto che e rivave di Buie bande Osôf, vuidade di un zovin di 23 agns.
Cun dut des curis dai sanitaris dal 118 rivâts daurman sul puest, l’om, che al jere origjinari di Cividât ma che al viveve di timp a Glemone, magari cussì no no le à fate.
Griviis ancje lis cundizions di chel altri automobilist, che la sô auto e je lade a finî tal fossâl e si è ribaltade. Une volte tirât fûr dai pompîrs di Glemone, al è stât puartât tal ospedâl di Udin. Il toc di strade al è restât sierât par cualchi ore e sul fat a stan investigant i carabinîrs di Glemone. (a.d.g.) – 16.10.2024
