Al è lât a sbati cu la sô moto cuintri di une machine intant che al stave tornant a cjase vie pe gnot dai 29 di Jugn, il dì dal so complean. Nol è stât nuie ce fâ par Gino Monaco, 58 agns di Feagne, imprenditôr agricul, che al è muart tor des dôs vie pe gnot intant che al vuidave la sô Mv Agusta.
Ae vuide de Opel Crossland al jere un om di 46 agns di Cividât, che di vie Nuova Olanda al stave jentrant su la strade provinciâl che in chel lûc si clame vie Caporiacco.
Il colp al è stât cetant fuart e dopo la moto e je lade cuintri di un pâl de lûs, intant che Monaco al à fat un svol di 15 metris. Ai socoridôrs rivâts daurman lis cundizions dal om a son someadis subite disperadis. Personâl sanitari e pompîrs a àn cirût di rianimâ Monaco, ma nol è stât nuie ce fâ. (a.d.g.) – 01.07.2024
