Un camionist rumen al è muart vuê a buinore, tor lis 10, dopo di un incident stradâl che al à cjapât trê mieçs pesants.
Il tamponament – e riferìs la Sores – al è sucedût dilunc de autostrade A4, intal trat cjapât dentri tra Redipulie – Monfalcon Ovest – Vilès, in direzion Vignesie, sul puint dal Lusinç. Sul puest l’ecuipaç di dôs ambulancis rivadis di Monfalcon e Çarvignan, la machine di emergjence mediche di Gardiscje, l’elisocors e lis Vuardiis dal Fûc, che a àn lavorât a lunc par tirâ fûr il cuarp dal om restât incjastrât intal abitacul. Sul puest ancje il personâl de autostrade. Ducj coordenâts dal Coa-Centri operatîf autostradâl di Udin. Intal incident a son restâts cjapâts altris doi autiscj. Un al à refudât il traspuart in ambulance, intant che chel altri lu àn puartât in ospedâl a Monfalcon cun feridis no gravis. (A.D.G.) – 26.04.2023
