Incident mortâl su la A4 vie pe gnot

Pari e fi a son muarts îr di gnot intun incident stradâl sucedût dilunc la autostrade A4 intal toc tra il grop di Palme e S. Zorç di Noiâr, in direzion di Vignesie.
E jere di pôc passade la miezegnot cuant che, par causis sot investigazion de bande de polizie stradâl di Palme, il veicul li che a viazavin – un Mercedes Vito – al è lât cuintri il parecjar. Par controlâ i dams, il vuidadôr si è movût bande la corsie di emergjence.
Pari e fi, di 44 e 19 agns, citadins rumens residents a Turin, a son smontâts dal mieç ma a son stâts cjapâts sot di un furgon vuidât di un citadin polac, che al à dât dentri al lôr mieç.
Ducj i doi a son muarts par vie des lesions tant gravis ripuartadis. Dentri dal veicul e jere ancje la femine dal vuidadôr, che e à ripuartât feridis lizeris. Il citadin polac, indagât par omicidi stradâl, al è stât puartât tal ospedâl di Udin.
Sul puest la polizie stradâl, lis vuardiis dal fûc, il personâl sanitari, chel di Autostrade Alto Adriatico e i mieçs di socors mecanic. (a.d.g.) – 12.01.2024