Un operari de cooperative Idealservice di Pasian di Prât al à pierdût la vite chest dopomisdì par vie di un incident sul lavôr che si è verificât dentri dal implant Fantoni di Osôf.
L’om al è colât dal alt intant che si cjatave sul tet dal capanon dal implant Plaxil 7, che al prodûs panei conglomerâts, in chescj dîs in manutenzion: l’operari a un ciert pont al è sbrissât, fruçonant la luminarie, colant cussì su la linie di produzion parsot. Il personâl de Fantoni al à clamât daurman i socors e dopo al à dât la colaborazion massime aes autoritâts che a son daûr a aciertâ il fat.
Sul puest a son rivadis une ambulance di Glemone e la machine di emergjence mediche di Udin. Dibant lis manovris salvevite: ai sanitaris nol è restât altri che aciertâ il decès. Ativâts ancje lis Vuardiis dal fûc e i Carabinîrs, che a son daûr a ricostruî il fat. (A.D.G.) – 07.06.2023
