Al è muart sul colp Daniel Tafa, 22 agns, l’operari cjapât in plen di une sclese dal implant sclopât a Manià ae 1.30 di gnot dentri dal stabiliment de Stm, aziende specializade tal setôr dal stampaç a cjalt.
Il zovin, nassût a S. Vît dal Tiliment e che al viveve a Vaiont, al veve a pene inviât l’implant di produzion cuant che il stamp che al stave lavorant, cun temperaduris une vore altis, al è lât in mil tocs. Un di chei, di metal, lu à cjapât in plen cence lassâi salvament.
A cirî di judâ il puar operari i siei coleghis che si cjatavin dongje. Sul puest a son po rivâts i infermîrs dal 118, i Vigjii dal Fûc e i carabinîrs di Spilimberc.
Il machinari indulà che il zovin al stave lavorant al è stât metût sot secuestri. Il turni di lavôr de buinore al è stât sospindût pal corot e par lassâ che a fossin completâts i rilêfs. (a.d.g.) – 25.03.2025
