Intal Friûl ocidentâl lis primis multis par chei che a bagnin i cjamps fûr orari

Cul ingriviâsi dal sec e de scjarsetât di aghe a son scomençâts i razionaments pe irigazion des culturis, ma come simpri al sucêt in situazions di crisi cualchidun no rispiete lis regulis e al prove di bagnâ plui di ce che al covente. A son rivadis cussì lis primis sanzions par chei che no rispietin i turnis di irigazion tai cjamps. Lis multis a son stadis fatis des vuardiis zuradis dal Consorzi Ciline Midune e a rivuardin bagnaduris fûr orari: une desene chês regjistradis intai ultins dîs. Metûts devant dal fat, i agricultôrs a àn provât a tirâ fûr cualchi scuse. “Cu lis tabelis inzornadis in maniere puntuâl – al à afermât Massimiliano Zanet, diretôr dal Consorzi – al è impussibil falâ”. (A.D.G.) 14.07.2022