Un frutin di 18 mês al è muart îr di sere intal ospedâl di Puart, dulà che al jere stât puartât di urgjence dopo jessi stât cjatât de mari in strade in fin di vite, pôc lontan di cjase, cuntun ematome al cjâf dovût a un traume grâf. A nuie no je valude la disperade corse in ospedâl di cualchi parint rivât sul puest dopo lis berliis par domandâ jutori. Il piçul si clamave Kurtesi Babil, fi di une cubie di origjin serbe che di pôc e vîf inte frazion di Mazzoalda. Un drame ancjemò dut di sclarî, par chest a son al lavôr i carabinîrs de stazion locâl che a son daûr a cirî di sclarî ce che al sedi sucedût, dopo vê segnalât la vicende ae Procure di Pordenon, che e à competence teritoriâl.
“O vin disponût za la autopsie che e sarà fate in curt dal miedi legâl Antonello Cirnielli – al sclarìs il procuradôr che al fâs funzion Maria Grazia Zaina -. O vin di valutâ se lis lesions a son compatibilis cu la ricostruzion fate dai familiârs, che a fevelin di une cjadude dal alt, par fissâ lis causis de muart”. La prime version dai gjenitôrs no varès convinçût dal dut i investigadôrs. Secont lôr il piçul al sarès sbrissât dal tapon de veture. Une des ipotesis e je che il piçul si sedi slontanât cence jessi viodût fin a rivâ ae strade e chi al puedi jessi stât cjapât sot di un auto, dopo scjampade. Ma no si escludin altris pistis, tra chestis un incident in ambit domestic. Lis primis indicazions medichis legâls a fevelaressin di une lesion al cjâf par vie di une fracade. Lis investigazions a van indenant. (a.d.g.) – 12.09.23
