Udiencis une vore curtis vuê tal Tribunâl di Udin, par cause dal siopar proclamât de Associazion nazionâl magjistrâts (Anm) cuintri de riforme de Justizie. Intes trê aulis indulà che e jere previodude ativitât, i judiçs a àn nome tornât a mandâ plui indenant lis udiencis za fissadis, dopo vê let un comunicât par displeâ lis resons de astension.
I magjistrâts a àn sotlineât che la Costituzion e previôt Judiçs e Publics ministeris che a fasin part dal stes ordin judiziari, imparziâi, indipendents e sogjets nome ae leç, in maniere cussì di garantî la avualance di ducj i citadins denant de leç. Se – come che e previôt la riforme – il Public ministeri al sarà separât di cheste jurisdizion, e resone la Anm, al sarà tirât dongje di un altri podê, condizionât des diretivis dal esecutîf, e nol podarà doprâ cun serenitât la polizie judiziarie.
“I prins a paiâ – a àn sclarît i judiçs – a saran i citadins che par lôr nol sarà realizât ad implen il principi di avualance parcè che – a disin i magjistrâts ae fin – cui che al fasarà lis investigazions al sarà condizionât par fuarce des sieltis politichis de maiorance di turni”. (a.d.g.) – 27.02.2025
