La Arena Alpe Adria di Lignan e tornarà tant che gnove

La Zonte comunâl di Lignan e à aprovât il progjet esecutîf pe manutenzion straordenarie de struture di 2.500 puescj che al domandarà un invistiment di 400 mil euros.

“Al è l’ultin pas – al à visât l’assessôr comunâl ai Lavôrs publics di Lignan, Marco Donà – di un iter par dâ in apalt i lavôrs e tornâ cussì indaûr ae citât une struture metude a gnûf e di podê doprâ. Chest intervent al jere necessari ancje par cause dai problemis intal implant eletric, idric e sanitari, cence dismenteâsi lis infiltrazions di aghe”. (a.d.g.) – 21.02.2025