La frute di Prate copade di une infezion ae gjambe

E sarès stade une infezion inte gjambe çampe che e à scjadenât une embolie polmonâr a copâ Natalia lauren Van Winkle, la frute americane di dodis agns cjatade muarte martars ai 5 di Març inte sô cjase a Puia di Prate.
Al è ce che al è saltât fûr vuê di matine de autopsie fate dal miedi legâl Antonio Cirnelli. Al esam, durat cuatri oris, a jerin presints ancje i consulents – Carlo Moreschi e Andrea Pettenazzo – nomenâts de dotoresse sot investigazion, la pediatre di 39 agns che domenie ai 3 di Març e veve visitât la frute li dal Pront socors di Pordenon.
La frute e jere lade tal ospedâl dopo vê cjapade une bote al zenoli dilunc di un alenament intal vinars dentri de base Usaf a Davian. (a.d.g.) – 12.03.2024