La Polizia di Stato de provincie di Udin e la Associazion nazionâl Polizia di Stato a àn celebrât vuê la Zornade de Memorie, no dome di dutis lis vitimis de persecuzion naziste, ma ancje dai poliziots che intal 1944 intan che a jerin in servizi ae Cuesture di Udin, a son stâts depuartâts intai cjamps di stermini naziscj cence fâ plui tornade in Patrie.
Il Capelan de Polizia di Stato di Udin, Bonsignôr Agnul Favretto, al à dit messe intal Templi Ossari presints Associazions di Arme, tantis autoritâts civîls e militârs, i vertiçs provinciâi di chês altris fuarcis armadis e di polizie, insiemi cul personâl de Polizia di Stato e ai familiârs dai muarts.
Al tiermin de messe, il Cuestôr Alfredo D’Agostino al à poiât intune cu lis autoritâts une corone in memorie dal sacrifici dai nûf poliziots, devant dal monument intal curtîl interni de Cuesture, visantsi des vitimis dal Olocaust, e, in particolâr, des Vuardiis di sigurece publiche de Cuesture di Udin copâts intai cjamps di stermini: Accorinti Filippo, Babolin Alberto, Bodini Bruno, Cascio Giuseppe, Comini Mario, D’Angelo Antonino, Pisani Anselmo, Savino Mario e Sgroi Giuseppe. L’unic sorevivent di chê batude tragjiche al è stât Spartero Toschi, che dopo la presonie e il cjamp di concentrament al à tornât a Udin, dulà che al murì intal 1964.
In lôr ricuart ai 22 di Avrîl passât, in presince dal Cjâf de Polizie, a son stadis poiadis devant de sede de epoche de Cuesture, in vie Trep, 9 Pieris di intop, che su chês vuê a buinore il Cuestôr e il president de Anps (Sezion di Udin) a àn mitût ancjetancj garofui ros. (A.D.G.) – 27.01.2023
